by WeaseLey
នាយករដ្ឋមន្ត្រីបញ្ជាមេដឹកនាំខេត្តស្តាប់កិច្ចប្រជុំគណៈរដ្ឋមន្ត្រីតាមVideo Conference
December 28, 2009 in Local News, Politics by WeaseLey
ដោយ លាង ដឺលុច (Radio France Internationale)
អត្ថបទចុះផ្សាយកាលពីថ្ងៃទី 28/12/2009 កែប្រែលើកចុងក្រោយកាលពីថ្ងៃទី 28/12/2009 12:15 ម៉ោងសកល
ប្រមុខ រដ្ឋាភិបាលកម្ពុជាទើបថ្លែងនៅថ្ងៃចន្ទនេះ បញ្ជាអោយមានការរៀបចំកិច្ចប្រជុំគណៈរដ្ឋមន្ត្រីមួយដែលបំពាក់ដោយ ប្រព័ន្ធបច្ចេកវិទ្យាវីដេអូ Conference ដើម្បីអនុញ្ញាតអោយអភិបាលខេត្ត និងប្រធានក្រុមប្រឹក្សាខេត្តបានចូលរួមតាមដានកិច្ចប្រជុំដ៏ សំខាន់នេះដែរ។ លោកនាយករដ្ឋមន្ត្រីពន្យល់ថា ធ្វើយ៉ាងនេះគឺដើម្បីចំណេញពេលវេលា និងដើម្បីអោយអាជ្ញាធរខេត្តយល់ច្បាស់នូវខ្លឹមសារកិច្ចប្រជុំ គណៈរដ្ឋមន្ត្រី។
វាជាភាពទំនើបមួយ ពិតមែនហើយ សំរាប់រដ្ឋាភិបាលកម្ពុជា នេះបើតាមការអត្ថាធិប្បាយរបស់លោក ធន សារាយ ប្រធានសមាគមការពារសិទ្ធិមនុស្សអាដហុក។ ប៉ុន្តែលោក ធន សារាយ ថ្លែងថា លោកមិនដែលឃើញមានកិច្ចប្រជុំគណៈរដ្ឋមន្ត្រីណា មានការចូលរួមដោយផ្ទាល់ពីថ្នាក់ខេត្តយ៉ាងដូច្នេះទេ។ ទោះយ៉ាងណា សំរាប់ប្រធានសមាគមសិទ្ធមនុស្សរូបនេះ វាមានផលវិជ្ជមាន និងផលអវិជ្ជមានខ្លះដែរ ក្នុងការរៀបចំកិច្ចប្រជុំដែលអនុញ្ញាតអោយមានការចូលរួមពីថ្នាក់ ខេត្ត។ វិជ្ជមានត្រង់ថា ពីពេលនេះទៅ ថ្នាក់ដឹកនាំខេត្តនឹងយល់ច្បាស់អំពីវិធានការ ឬសេចក្តីសំរេចរបស់រដ្ឋាភិបាលតាមរយៈការស្តាប់ឮការពិភាក្សារបស់ គណៈរដ្ឋមន្ត្រី។ វាជាការបង្កើនសមត្ថភាពការអនុវត្តន៍សេចក្តីសំរេចរបស់រដ្ឋាភិបាល ដែរ។ ប៉ុន្តែវាមានចំណុចអវិជ្ជមាននៅត្រង់ថា មិនអាចគ្រប់រឿងនៅថ្នាក់ជាតិ ត្រូវតែពាក់ព័ន្ធអាជ្ញាធរថ្នាក់មូលដ្ឋានទាំងអស់នោះទេ ដូចជារឿងថវិកាជាតិជាដើម។ លោក ធន សារាយ បន្តថា ការចូលរួមរបស់ថ្នាក់ខេត្តទៅក្នុងកិច្ចប្រជុំគណៈរដ្ឋមន្ត្រីក៏ ធ្វើអោយខាតបង់ពេលវេលារបស់អាជ្ញាធរខេត្តក្នុងការបំពេញការងារ មូលដ្ឋានរបស់ខ្លួនទៀត ពីព្រោះពួកគេត្រូវរង់ចាំត្រៀមផ្តល់ព័ត៌មានរហូត៕
