by WeaseLey
ថាក់ស៊ីនជម្រុញឲ្យកម្ពុជានាំចេញស្រូវ
December 15, 2009 in Business, Local News by WeaseLey
(Radio France Internationale)
ដោយ លី ម៉េងហួរ
អត្ថបទចុះផ្សាយកាលពីថ្ងៃទី 15/12/2009 កែប្រែលើកចុងក្រោយកាលពីថ្ងៃទី 15/12/2009 13:12 ម៉ោងសកល
ដំណើរ ទៅកាន់ប្រទេសកម្ពុជាជាលើកទី២ក្នុងនាមទីប្រឹក្សាសេដ្ឋកិច្ចរបស់ រដ្ឋាភិបាលកម្ពុជា នៅថ្ងៃនេះ លោកអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត្រា បានជម្រុញឲ្យរដ្ឋាភិបាលកម្ពុជាបង្កើនលទ្ធភាពដើម្បីផលិតដំណាំ កសិកម្ម ពិសេស ការបង្កបង្កើនផលស្រូវ។ ស្រូវ អង្ករដែលកម្ពុជានៅឆ្នាំ ២០១០ អាចសល់សម្រាប់ការនាំចេញប្រមាណ ២,៦៤ លានតោន និងបើគិតជាប្រាក់ប្រមាណ ១ ពាន់លានដុល្លារ។
គឺ ជាគំនិតផ្តួចផ្តើមថ្មីរបស់លោកអតីតនាយករដ្ឋមន្ត្រីថៃ ថាក់ស៊ីន ដែលបានលើកឡើងក្នុងកិច្ចប្រជុំជាង ៣ម៉ោងស្តីពីការអភិវឌ្ឍន៍វិស័យកសិកម្មនៅវិមានរាជរដ្ឋាភិបាល កម្ពុជា ចំពោះមុខអ្នកជំនាញសេដ្ឋកិច្ចជាតិប្រមាណ៣០ រូបកាលពីព្រឹកថ្ងៃអង្គារ ទី ១៥ ធ្នូ ឆ្នាំ២០០៩។ ក្នុងបរិបទនៃវិបត្តិសេដ្ឋកិច្ចពិភពលោកបច្ចុប្បន្ន រដ្ឋាភិបាលកម្ពុជាបានចាត់ទុកការអភិវឌ្ឍន៍វិស័យកសិកម្ម រឹតតែមានសារៈសំខាន់ខ្លាំង និងជាអាទិភាពខ្ពស់ថែមទៀត ដើម្បីជួយកាត់បន្ថយផលប៉ះពាល់ពីវិបត្តិសេដ្ឋកិច្ចក្នុងប្រទេស កម្ពុជា។ កម្ពុជាដែលមានសក្តានុពលខ្លាំងក្នុងវិស័យកសិកម្ម និងមិនទាន់បានទាញយកប្រយោជន៍ឲ្យបានដល់កម្រិតអតិបរិមា ហើយផលិតផលកសិកម្មកំពុងមានតម្រូវការខ្ពស់នៅក្នុងទីផ្សារតំបន់ និងអន្តរជាតិ។
ដើម្បី សម្រេចបានការបង្កើនផលិតភាពវិស័យកសិកម្ម លោក ថាក់ស៊ីន បានជម្រុញឲ្យរដ្ឋាភិបាលកម្ពុជាផ្តល់ប្រាក់កម្ចីឥណទានខ្នាតតូចដល់ កសិករខ្មែរក្រីក្រ ដើម្បីបង្កបង្កើនផលកសិកម្មជាលក្ខណៈគ្រួសារ ក្នុងបំណងរក្សាឲ្យបាននូវសន្តិសុខស្បៀង និងអាចសល់ផលិតផលកសិកម្ម ជាពិសេស សល់ស្រូវសម្រាប់ការនាំចេញ។ ក្នុងកិច្ចប្រជុំពិសេសជាមួយនឹងលោក ថាក់ស៊ីន នៅព្រឹកមិញ លោក ច័ន្ទ សារុន រដ្ឋមន្ត្រីក្រសួងកសិកម្មបានលើកឡើងថា សម្រាប់ឆ្នាំ២០១០នេះ ការបង្កបង្កើនផលស្រូវនៅប្រទេសកម្ពុជាទទួលបានជាង ៧,៣ លានតោន។ ពោលគឺកម្ពុជា មានសន្តិសុខស្បៀងគ្រប់គ្រាន់ និងអាចសល់ស្រូវដែលគិតជាអង្ករ សម្រាប់ការនាំចេញប្រមាណ ២,៦៤ លានតោន ស្មើប្រមាណ ១ ពាន់លានដុល្លារ។
សេចក្តីប្រកាសរបស់ឧត្តម ក្រុមប្រឹក្សាសេដ្ឋកិច្ចជាតិនៅថ្ងៃនេះ ក៏បានលើកឡើងថា លោក ថាក់ស៊ីន ក៏បានសន្យាជួយថវិកាដើម្បីធ្វើកសិដ្ឋានគំរូពីរ សម្រាប់បង្ហាញជូនដល់ប្រជាកសិករអំពីបច្ចេកទេសនៃការធ្វើកសិដ្ឋាន លក្ខណៈគ្រួសារ។ ជាយុទ្ធសាស្ត្រដែលលោកថាក់ស៊ីន ទទួលបានជោគជ័យនៅប្រទេសថៃកន្លងមក។ បន្ទាប់ពីត្រូវបានតែងតាំងជាទីប្រឹក្សាផ្ទាល់លោកនាយករដ្ឋមន្ត្រី ហ៊ុន សែន និងជាទីប្រឹក្សារដ្ឋាភិបាលកម្ពុជាផ្នែកសេដ្ឋកិច្ច លោក ថាក់ ស៊ីន បានធ្វើបាឋកថានៅកម្ពុជាម្តងហើយកាលពីថ្ងៃទី ១៣ វិច្ឆិកា ឆ្នាំ២០០៩៕
