(Radio Free Asia)

ដោយ សុខ សេរី

2009-12-10

មន្រ្តី ​ក្រសួង​សុខាភិបាល​កម្ពុជា​បាន​ឲ្យ​ដឹង​ថា ចំនួន​អ្នក​ឆ្លង​មេរោគ​ផ្ដាសាយ​ប្រភេទ​ថ្មី A(H1N1) នៅ​កម្ពុជា បាន​កើន​ដល់​៤៨៧​នាក់​ហើយ បើ​ប្រៀប​ធៀប​នឹង​សប្ដាហ៍​កន្លង​ទៅ​ថ្មីៗ​នេះ។

អនុ​ប្រធាន​នៃ​នាយកដ្ឋាន​គ្រប់គ្រង​ជំងឺ​ឆ្លង​របស់​ក្រសួង​សុខាភិបាល​ កម្ពុជា លោក លី សូវ៉ាន់ បាន​មាន​ប្រសាសន៍​បញ្ជាក់​ប្រាប់​វិទ្យុ​អាស៊ី​សេរី​នៅ​ថៃ្ង​ព្រហស្បតិ៍ ១០ ធ្នូ​នេះ​ថា ប្រជាពលរដ្ឋ​ដែល​កំពុង​តែ​កើត​ជំងឺ​ផ្តាសាយ A(H1N1) នៅ​កម្ពុជា បាន​កើន​ទ្បើង​ចំនួន​៤៨៧​នាក់​ហើយ បើ​ប្រៀប​ធៀប​ទៅ​នឹង​សប្តាហ៍​កន្លង​ទៅ​ថ្មីៗ​នេះ ដែល​ចំនួន​តែ​៤៨០​នាក់​តែ​ប៉ុណ្ណោះ។ រី​ឯ​ចំនួន​ប្រជាពលរដ្ឋ​បាន​ស្លាប់​ដោយសារ​ជំងឺ​នេះ​នៅ​តែ​មាន​ចំនួន​៥​នាក់ ​ដដែល។

លោក លី សូវ៉ាន់ បាន​មាន​ប្រសាសន៍​បន្ត​ទៀត​ថា ថ្នាំ​វ៉ាក់សាំង​បង្ការ​ជំងឺ​ផ្តាសាយ A(H1N1) ចំនួន​ជាង​៣០​ម៉ឺន​ដូស សន្យា​ផ្តល់​ឲ្យ​ដោយ​អង្គការ​សុខភាព​ពិភពលោក (WHO) នឹង​មក​ដល់​ប្រទេស​កម្ពុជា​នៅ​ដំណាច់​ខែ​ធ្នូ​២០០៩​នេះ។

ប្រភព​ដដែល​បាន​បញ្ជាក់​ថា គោល​ដៅ​សម្រាប់​ការ​ចាក់​ថ្នាំ​វ៉ាក់សាំង​ចំនួន​ជាង​៣០​ម៉ឺន​ដូស​នោះ គឺ​ទី​១ សម្រាប់​ក្រុម​គ្រូពេទ្យ​ដែល​ធ្វើ​ការងារ​ជិត​ដិត​ជាមួយ​នឹង​អ្នក​ជំងឺ​ ផ្តាសាយ A(H1N1) ទី​២ សម្រាប់​ស្រ្តី​មាន​ផៃ្ទ​ពោះ និង​ទី​៣ សម្រាប់​កុមារ​ដែល​មាន​អាយុ​ពី​២​ខែ​ដល់​២​ឆ្នាំ។

ការ​ចាក់​ថ្នាំ​វ៉ាក់សាំង​នោះ នឹង​មិន​យក​កម្រៃ​អ្វី​ទេ។ ក្រសួង​សុខភិបាល​មាន​គម្រោង​​ការ​ស្នើ​សុំ​ថ្នាំ​វ៉ាក់សាំង​នោះ​បន្ថែម​ទៀត​ សម្រាប់​ប្រជាពលរដ្ឋ​នានា​ដែល​កើត​ជំងឺ​រ៉ាំរ៉ៃ៕