by WeaseLey
តុលាការក្រុងភ្នំពេញផ្តន្ទាទោស ៧ឆ្នាំលើចារបុរសថៃ
December 8, 2009 in ជីវិត និងសង្គម by WeaseLey
(Radio France Internationale)
ដោយ លី ម៉េងហួរ
អត្ថបទចុះផ្សាយកាលពីថ្ងៃទី 08/12/2009 កែប្រែលើកចុងក្រោយកាលពីថ្ងៃទី 08/12/2009 12:15 ម៉ោងសកល
តុលាការ ក្រុងភ្នំពេញ នៅថ្ងៃអង្គារ ទី ៨ធ្នូនេះ បានសម្រេចផ្តន្ទាទោសដាក់ពន្ធនាគារលើចារបុរសថៃចំនួន ៧ឆ្នាំ និងពិន័យជាប្រាក់ ១០លានរៀល ស្មើប្រមាណ ២៥០០ដុល្លារ។ បុរសថៃឈ្មោះ Siwarak Chothipong ជាប់ចោទពីបទផ្តល់ព័ត៌មានចារកម្ម ទៅឲ្យរដ្ឋាភិបាលថៃ អំពីដំណើររបស់លោកអតីតនាយករដ្ឋមន្ត្រីថៃ ថាក់ស៊ីន មកកម្ពុជា កាលពីថ្ងៃទី ១០វិច្ឆិកា កន្លងមក។
គឺ ជាសេចក្តីសម្រេច បន្ទាប់ពីតុលាការក្រុងភ្នំពេញបានបើកសវនាការ ៥ម៉ោង ដើម្បីកាត់ទោសបុរសជនជាតិថៃ Siwarak Chothipong ដែលជាប់ចោទពីបទចារកម្ម លួចចំលងឯកសារ ស្តីពីជើងយន្តហោះឯកជនរបស់លោកអតីតនាយករដ្ឋមន្ត្រីថៃ ថាក់ស៊ីន មកកាន់ប្រទេសកម្ពុជា កាលពីថ្ងៃ ១០វិច្ឆិកា។
ក្នុងសេចក្តី សម្រេចនៅមុននេះបន្តិច លោកចៅក្រមកែ សាខន ប្រធានក្រុមប្រឹក្សាជំនុំជម្រះដែលមានចៅក្រម ៣រូបបានប្រកាសថា ចារបុរសថៃ Siwarak ពិតជាមានចេតនាទុច្ចរិតក្នុងការផ្តល់ព័ត៌មានពីជើងយន្តហោះរបស់លោក ថាក់ស៊ីន មកកាន់ប្រទេសកម្ពុជា ដែលនាំឲ្យប៉ះពាល់ដល់សន្តិសុខជាតិ និងសន្តិសុខសាធារណៈ។ បុរសថៃនេះ ក៏បានទាក់ទងតាមទូរស័ព្ទ ដើម្បីផ្តល់ឯកសារព័ត៌មាននេះ ទៅកាន់លេខាទី ១ស្ថានទូតថៃនៅភ្នំពេញពិតមែន។
លោកអតីតនាយករដ្ឋមន្ត្រីថៃ ថាក់ស៊ីន ត្រូវបានតែងតាំងជាទីប្រឹក្សាសេដ្ឋកិច្ចរបស់រដ្ឋាភិបាលកម្ពុជា ខណៈដែលរដ្ឋាភិបាលថៃកំពុងតាមចាប់ខ្លួន។
ចំពោះសេចក្តីសម្រេច ផ្តន្ទាទោសបុរសចារកម្មថៃ ៧ឆ្នាំត្រូវបានមេធាវីរដ្ឋាភិបាល លោក ប៉ាល់ ច័ន្ទតារា ចាត់ទុកជាការត្រឹមត្រូវ ដោយសំអាងថា សំណុំរឿងចារកម្មនេះ មានភស្តុតាងគ្រប់គ្រាន់។ ចំណែកមេធាវីចារបុរសថៃ លោកខៀវ សំបូរមិនហ៊ាននិយាយថា ការផ្តន្ទាទោសនេះទទួលយកបាន ឬមិនទទួលយកបានទេ។ ការប្តឹងឧទ្ទរណ៍ ឬក៏ត្រូវស្នើសុំលើកលែងទោសពីព្រះមហាក្សត្រ លោកមេធាវីអះអាងថា មិនទាន់ពិភាក្សាជាមួយកូនក្តីនៅឡើយទេ។
ចារបុរសថៃ Siwarak អាយុ ៣១ឆ្នាំ ជាវិស្វករ បម្រើការនៅក្រុមហ៊ុនសេវាកម្មអាកាសចរណ៍កម្ពុជា ហៅកាត់ថា CATS ដែលជាក្រុមហ៊ុនត្រួតពិនិត្យរាល់ជើងហោះហើរនៅក្នុងប្រទេសកម្ពុជា។ បុរសថៃរូបនេះត្រូវបានចាប់ខ្លួនកាលពីថ្ងៃទី ១២វិច្ឆិកា ឆ្នាំ២០០៩ គឺ ២ថ្ងៃ បន្ទាប់ពីដំណើរមកដល់របស់លោកអតីតនាយករដ្ឋមន្ត្រីថៃ ថាក់ស៊ីន នៅកម្ពុជា។
ក្នុងអង្គសវនាការនៅថ្ងៃអង្គារនេះ ចារបុរសថៃ ស៊ីវ៉ារ៉ាក់ បានប្រាប់តុលាការថា ខ្លួនបានឃើញតារាងនៃជើងហោះហើរយន្តហោះឯកជនរបស់លោកអតីតនាយក រដ្ឋមន្ត្រីថៃ ថាក់ស៊ីន និងបានផ្តល់ដំណឹងនោះទៅដល់លោក Kamrob Palawatwichai លេខាទី ១ ស្ថានទូតថៃប្រចាំកម្ពុជា ក្រោយពីយន្តហោះឯកជន CL 30 របស់លោកថាក់ស៊ីនបានចុះចតដល់ដីហើយ។
ក្នុង សវនាការនៅព្រឹកមិញ មានបុគ្គលិក ២រូបរបស់ក្រុមហ៊ុនសេវាអាកាសចរណ៍កម្ពុជា CATS បានធ្វើជាសាក្សីនៅក្នុងសវនាការតុលាការក្រុងភ្នំពេញ ជាមួយនឹងមន្ត្រីប៉ូលីសក្រសួងមហាផ្ទៃចំនួន ៥រូបផ្សេងទៀត។ ក្នុងនោះក៏មានក្រុមគ្រួសារ មន្ត្រីស្ថានទូតថៃ រួមទាំងអ្នកកាសែតខ្មែរ និងអ្នកកាសែតថៃជាច្រើននាក់ផ្សេងទៀត៕
