(Radio Free Asia)

ដោយ មណ្ឌលកែវ

2009-11-27

ក្រុមហ៊ុន ​ទូរស័ព្ទ​ចល័ត​ម៉ូប៊ីតែល ០១២ ត្រូវ​បាន​គ្រប់គ្រ​ងផ្តាច់​មុខ​ដោយ​ក្រុមហ៊ុន​រ៉ូយ៉ាល់ហ្គ្រូប (Royal Group) ចាប់​ពី​ពេល​នេះ​ត​ទៅ​ហើយ បន្ទាប់​ពី​ក្រុមហ៊ុន​នេះ​បាន​ទិញ​ភាគហ៊ុន​ទាំង​អស់​ពី​ដៃគូ​វិនិយោគ​ទុន​ បរទេស​របស់​ខ្លួន​កាល​ពី​ថ្ងៃ​ព្រហស្បតិ៍​កន្លង​ទៅ។

លោក គិត ធៀង ប្រធាន​ក្រុមហ៊ុន​រ៉ូយ៉ាល់ហ្គ្រូប បាន​មាន​ប្រសាសន៍​ប្រាប់​វិទ្យុ​អាស៊ីសេរី​នៅ​ព្រឹក​ថ្ងៃ​ទី​២៧ វិច្ឆិកា ថា ដោយ​ពិនិត្យ​ឃើញ​ទីផ្សារ​នៃ​មុខរបរ​ទូរគមនាគមន៍​មាន​ការ​រីក​ចម្រើន​ល្អ​និង ​មាន​សក្តានុពល ទើប​ក្រុមហ៊ុន​រ៉ូយ៉ាល់ហ្គ្រូប​សម្រេច​ទិញ​ផ្តាច់​ភាគហ៊ុន​ពី​ក្រុមហ៊ុន Millicom International Cellula នៃ​ប្រទេស​លុចហ្សំបួរ (Luxemburg) យក​មក​គ្រប់គ្រង​តែម្តង។

លោក គិត ធៀង បាន​បញ្ជាក់​ថា ៖ «គ្រាន់​តែ​ថា យើង​រកស៊ី​ទៅ យើង​ចង់​ទិញ​ផ្ដាច់​ពី​ខាង Partner​(ដៃគូ)​យើង វា​ជា​រឿង​ធម្មតា​ទេ​តើ​អា​ហ្នឹង ការ​រកស៊ី! ចុះ​យើង​ខ្មែរ យើង​ទិញ​របស់​នៅ​ស្រុក​ខ្មែរ យើង​ទៅ​ទិញ​នៅ​ក្រៅ​ធ្វើ​អី!»។

ការ​ទិញ​ភាគហ៊ុន​ដ៏​ធំ​ដែល​ពុំ​ធ្លាប់​មាន​កន្លង​ទៅ​នៅ​ប្រទេស​កម្ពុជា​ នេះ​បាន​ធ្វើ​ឡើង​កាល​ពី​ថ្ងៃ​ព្រហស្បតិ៍ ដោយ​ក្រុមហ៊ុន​រ៉ូយ៉ាល់ហ្គ្រូប​ដែល​ជា​ក្រុមហ៊ុន​វិនិយោគ​ទុន​ក្នុង​ស្រុក​ មួយ​គ្រប់គ្រង​ដោយ​ឧកញ៉ា គិត ធៀង ជាមួយ​ដៃគូ​វិនិយោគ​ទុន​បរទេស​គឺ​ក្រុមហ៊ុន Millicom International Cellular នៃ​ប្រទេស​លុចហ្សំបួរ ដែល​មាន​ភាគហ៊ុន​រហូត​ដល់​ទៅ​៦១,៥% គិត​ជា​ទឹក​ប្រាក់​គឺ​៤២១​លាន​ដុល្លារ​អាមេរិក​នោះ។

ប្រធាន​ក្រុមហ៊ុន សំផាន់ណារិទ្ធិ ឌីវិលឡបមិន ហ្គ្រូប ខូអិលធីឌី (Samphanarith Development Group Co., Ltd.) មាន​ប្រសាសន៍​ថា ការ​ទិញ​ភាគហ៊ុន​ដ៏​ធំ​របស់​ក្រុមហ៊ុន​រ៉ូយ៉ាល់ហ្គ្រូប​បង្ហាញ​ថា វិនិយោគិន​ជាតិ​មាន​សក្តានុពល​អាច​ធ្វើ​ឲ្យ​មាន​ការ​អភិវឌ្ឍ​សេដ្ឋកិច្ច​ ជាតិ​បាន ៖ «អា​ហ្នឹង​គឺ​ជា​ភាព​ឈ្លាស​វៃ​របស់​ខ្មែរ​យើង​ដែរ ភាព​វៃ​ឆ្លាត​មួយ​សម្រាប់​អ្នក​រកស៊ី​នៅ​ក្នុង​ប្រទេស ហើយ​គាត់​ជា​ជនជាតិ​ខ្មែរ​យើង​ផងដែរ។ គឺ​ថា​មោទនភាព​ណាស់​ដែល​ខ្ញុំ​បាន​ទទួល​ដំណឹង​ហ្នឹង​ណា៎! ដែល​ថា គាត់​បាន​កាត់​ភាគហ៊ុន​ពី​បរទេស​យក​មក​កាន់​នៅ​ក្នុង​ស្រុក​ខ្មែរ​យើង​តែ​ ម្ដង​ហ្នឹង»។

ក្រុមហ៊ុន​ទូរស័ព្ទ​ចល័ត​ម៉ូប៊ីតែល ០១២ ជា​ក្រុមហ៊ុន​ដែល​បាន​នាំ​ចូល​នូវ​ប្រព័ន្ធ​បច្ចេក​វិទ្យា​សេវាកម្ម​បង់​ ប្រាក់​ជា​មុន ដែល​ហៅ​ថា ប្រព័ន្ធ​សេលកាត (Cell Card) មុន​ដំបូង​គេ​នៅ​ក្នុង​ប្រទេស​កម្ពុជា។ ក្រុមហ៊ុន​នេះ​មាន​ភាគហ៊ុន​ក្នុង​ស្រុក​ចំនួន​៣៨,៥% ដែល​តំណាង​ដោយ​ក្រុមហ៊ុន​រ៉ូយ៉ាល់ហ្គ្រូប។

ប្រភព​ព័ត៌មាន​បាន​ឲ្យ​ដឹង​ថា ទឹក​ប្រាក់​ចំនួន​៤២១​លាន​ដុល្លារ​អាមេរិក​ដែល​ក្រុមហ៊ុន​រ៉ូយ៉ាល់ហ្គ្រូប​ ប្រើប្រាស់​ក្នុង​ការ​ទិញ​ភាគហ៊ុន​ពី​ក្រុមហ៊ុន Millicom International Cellular នៃ​ប្រទេស​លុចហ្សំបួរ​នេះ ត្រូវ​បាន​ជួយ​សម្រួល​ពី​ធនាគារ​បរទេស​ធំៗ​ចំនួន​ពីរ​គឺ Standard Bank Plc និង​ធនាគារ ANZ Group Limited៕