by WeaseLey
គុណភាពមន្រ្តីរាជការមានសារៈសំខាន់ជាងបរិមាណ
November 25, 2009 in Local News by WeaseLey
ដោយ គី សុខលីម (ដកស្រង់ចេញពី RFI)
អត្ថបទចុះផ្សាយកាលពីថ្ងៃទី 23/11/2009 កែប្រែលើកចុងក្រោយកាលពីថ្ងៃទី 23/11/2009 14:48 ម៉ោងសកល
រាជរដ្ឋាភិបាល កម្ពុជា បានសម្រេចផ្អាកជ្រើសរើសមន្រ្តីរាជការបន្ថែមនិងផ្អាកដំឡើង ឋានន្តរសក្តិមន្ត្រីរាជការសម្រាប់ឆ្នាំ ២០១០ខាងមុខនេះ។ តើនេះជាមធ្យោបាយត្រឹមត្រូវដែរឬទេ?
ក្រុមប្រឹក្សាភិបាលខ្មែរកាល ពីពេលថ្មីៗកន្លងមកនេះ រាជរដ្ឋាភិបាលកម្ពុជាបានសម្រេចផ្អាកការជ្រើសរើសមន្ត្រីរាជការ បន្ថែមនិងផ្អាកដំឡើងឋានន្តរសក្តិមន្ត្រីរាជការនៅឆ្នាំ ២០១០ខាងមុខនេះ។
ការសម្រេចផ្អាកជ្រើសរើសមន្ត្រីរាជការនិងការ ផ្អាកដំឡើងឋានន្តរសក្តិនេះ ត្រូវបានមន្រ្តីជាន់ខ្ពស់នៃរាជរដ្ឋាភិបាលកម្ពុជាមួយចំនួនពន្យល់ ថាគឺដើម្បីរួមចំណែកសន្សំសំចៃថវិកាជាតិសម្រាប់ឆ្នាំ ២០១០ខាងមុខនេះ។ អ្នកជំនាញមួយចំនួនបាននិយាយថា ការប្រកាសសន្សំសំចៃថវិកានេះគឺបានធ្វើឡើងចំពេលដែលសេដ្ឋកិច្ចនៃ ប្រទេសកម្ពុជាបាននិងកំពុងរងផលប៉ះពាល់ពីវិបត្តិសេដ្ឋកិច្ច ពិភពលោកយ៉ាងធ្ងន់ធ្ងរ។ ស្ថាប័នហិរញ្ញវត្ថុមួយចំនួនបានទស្សន៍ទាយថា សេដ្ឋកិច្ចនៃប្រទេសកម្ពុជានៅឆ្នាំ ២០០៩នេះនឹងពុំទទួលបានកំណើនទេពោលគឺសេដ្ឋកិច្ចនៅឆ្នាំនេះស្ថិត ក្នុងអត្រាអវិជ្ជមានតែម្តង។
តើការសម្រេចផ្អាកជ្រើសរើសមន្រ្តី រាជការបន្ថែមនិងផ្អាកដំឡើងឋានន្តរសក្តិមន្ត្រីរាជការសម្រាប់ឆ្នាំ ២០១០ខាងមុខនេះជាមធ្យោបាយត្រឹមត្រូវដែរឬទេ?
ឆ្លើយតបទៅនឹង សំនួរនេះមតិខ្លះបានសម្តែងក្តីព្រួយបារម្ភអំពីកង្វះខាតចំនួន មន្រ្តីនៅក្នុងក្រសួងមួយចំនួនដោយសារមន្ត្រីចូលនិវត្តន៍មានចំនួន កាន់តែច្រើនឡើងៗ។ ប៉ុន្តែសម្រាប់មតិខ្លះទៀត ពួកគេបានឆ្លើយភ្លាមៗថា រាល់ការផ្អាកខាងលើនេះគឺជាជម្រើសដ៏ត្រឹមត្រូវបំផុត ពីព្រោះការជ្រើសរើសមន្រ្តីរាជការបន្ថែមនិងការដំឡើងឋានន្តរសក្តិគឺ សុទ្ធតែជាគោលដៅនៃការចំណាយបន្ថែមថវិកា
រដ្ឋទាំងអស់ រីឯរដ្ឋវិញកំពុងស្ថិតនៅក្នុងស្ថានភាពលំបាកលំបិនផ្នែកហិរញ្ញវត្ថុក្នុងកាលៈទេសៈវិបត្តិសេដ្ឋកិច្ចពិភពលោក។
ម្យ៉ាងវិញទៀត ការផ្អាកជ្រើសរើសមន្រ្តីរាជការបន្ថែមឬការផ្អាកតែងតាំងនេះក៏អាច ជាឱកាសមួយសម្រាប់រាជរដ្ឋាភិបាលដើម្បីឆ្លើយតបទៅនឹងមតិរិះគន់ ចំពោះចំនួនសមាសភាពគណៈរដ្ឋមន្រ្តីក្បាលធំជាងខ្លួន ដែលជាប្រការធ្វើអោយរដ្ឋចំណាយថវិកាយ៉ាងច្រើនសន្ធឹកសន្ធាប់។
បើយោង តាមទស្សនៈរបស់អ្នកវិភាគមួយចំនួន រាជរដ្ឋាភិបាលគួរបន្ថែមពេលវេលានៃការផ្អាកជ្រើសរើសមន្រ្តីរាជការឬ ដំឡើងថានន្តរសក្តិមន្រ្តីរាជការបន្តទៀត ពីព្រោះបើពិនិត្យលើតថភាពជាក់ស្តែង បច្ចុប្បន្ននេះមន្រ្តីរាជការមានចំនួនច្រើនល្មមអាចបំពេញការងារបាន រីឯមន្រ្តីមានតំណែងក៏មានចំនួនច្រើនណាស់ដែរ។
អង្គការសង្គម ស៊ីវិលនិងគណបក្សប្រឆាំងតែងតែរិះគន់ថា ក្រសួងនីមួយៗមានមន្រ្តីរាជការច្រើនជ្រុលពេក រីឯចំនួនមន្រ្តីដែលមកធ្វើការពិតប្រាកដឬចំនួនមន្រ្តីដែលធ្វើការ ប្រកបដោយប្រសិទ្ធិភាពនោះមានចំនួនតិចតួចពេក។ ដូច្នេះតាមរយៈការរិះគន់នេះ គេពិតជាអាចនិយាយបានថា ចំនួនមន្រ្តីរាជការនៅតាមក្រសួងនីមួយៗនៅមិនទាន់ចោទជាបញ្ហានៅឡើយ ទេ ពោលគឺរដ្ឋាភិបាលអាចមិនបាច់រើសមន្រ្តីរាជការបន្ថែមទៀតក្នុង រយៈពេលវែងក៏បានដែរ។
ចំនួនមន្រ្តីរាជការមិនទាន់ចោទជាបញ្ហា ទេនៅពេលនេះ ប៉ុន្តែ អ្វីដែលជាក្តីកង្វល់គឺទាក់ទងទៅនឹងប្រសិទ្ធិភាពការងាររបស់មន្ត្រី រាជការ។ អ្នកវិភាគដដែលបានអត្ថាធិប្បាយថា រដ្ឋាភិបាលគួរផ្តោតការយកចិត្តទុកដាក់ទៅលើសមត្ថភាពការងាររបស់ មន្ត្រីរាជការអោយបានខ្លាំងជាងចំនួនមន្រ្តីរាជការ។
អ្នកវិភាគ ដដែលបានបញ្ជាក់បន្ថែមថា រដ្ឋាភិបាលគួរទទួលយកមន្ត្រីរាជការក្នុងចំនួនតិចប៉ុន្តែធ្វើការ បានច្រើននិងមានប្រសិទ្ធិភាពខ្ពស់ហើយចំនុចនេះ វាប្រសើរជាងការទទួលយកមន្រ្តីក្នុងចំនួនច្រើនប៉ុន្តែធ្វើការបាន តិចនិងគ្មានប្រសិទ្ធិភាព។ និយាយបែបផ្សេង គុណភាពឬសមត្ថភាពរបស់មន្ត្រីរាជការគួរតែត្រូវបានគេយកចិត្តដាក់ ជាងចំនួនឬបរិមាណនៃមន្រ្តីរាជការ។
អ្នកវិភាគដដែលបាន កត់សម្គាល់ថា មន្រ្តីរាជការបច្ចុប្បន្នមួយចំនួនមានសមត្ថភាពខ្ពស់ ប៉ុន្តែដោយសារប្រាក់ខែមានចំនួនតិចតួចពេកអ៊ីចឹងហើយបានជាការងារ មិនសូវមានគុណភាពនិងប្រសិទ្ធិភាព។ ពេលខ្លះមន្រ្តីមានសមត្ថភាពបានចាកចេញពីការងាររដ្ឋទៅធ្វើការនៅតាម អង្គការឬនៅតាមក្រុមហ៊ុនដែលមានប្រាក់ខែខ្ពស់។
សរុបសេចក្តីមក រាជរដ្ឋាភិបាលគួរតែរិតត្បិតចំនួនមន្រ្តីរាជការក្នុងចំនួនតិចល្មម ប្រកបដោយប្រសិទ្ធិភាពខ្ពស់ វាប្រសើរជាងការជ្រើសរើសមន្រ្តីរាជការបន្ថែមច្រើនជ្រុលពេកហើយ គ្មានគុណភាពនោះ៕
ការផ្អាកការតម្លើងឋានន្តរសក្ដិ មន្ត្រីរាជការគឺជាការមួយសមគួរហើយសម្រាប់រាជរដ្ឋាភិបាលខ្មែរ
តែខ្ញុំយល់ថាវាជាការមួយស្រដៀង នឹងភាសាមួយដែលខ្ញុំចំណាំតែនិយាយថា «អត់ប្រយោជន៍»។
ថ្វីត្បិតតែគេយកលេសថាសន្សំកញ្ចប់ថវិការជាតិ តែការពិតនេះជាក្របបិទបាំងការរកលុយក្រោមតុរបស់គេតែប៉ុណ្ណោះ។ ទោះជាមិនបាច់ឡើងឋានៈ ក៏ពួកគេនៅតែអាចរកលុយថែមបានដូចតែគ្នាហ្នឹង។
ប៉ុន្តែ អ្នកតូចតាចរកអីអត់បានវិញ ដេកស្លាប់ហើយមើលទៅ!!!