by evannak
រឿងចចក
September 28, 2009 in Uncategorized by evannak
កាលពីព្រេងនាយមានចចកត្រោស ធំមួយដល់ខែលំហើយ វាដើររកត្រពាំងបឹងបួដែលរីងទឹកដើម្បីចាប់ត្រីស៊ី ។ លុះទៅដល់ត្រពាំងមួយ រីងទឹកអស់នៅតែប្រឡង់មួយឃើញសុទ្ធតែភក់ មានត្រីកំពឹស បង្កង ក្ដាមជាច្រើនណាស់ ។ ចចកឃើញហើយមានចិត្តត្រេកអររីករាយគិតថា “ថ្ងៃនេះអញមានលាភធំណាស់ ជាលាភចំឡែកជាងសព្វថ្ងៃ” ។ ឯកំពឹសមានប្រាជ្ញ ឮចចកថាដូច្នោះហើយក៏និយាយលួងលោមចចកថា “យើង ទាំងអស់គ្នាសុទ្ធតែជាចំណីបងចចកឯងទាំងអស់ហើយ ប៉ុន្តែយើងប្រឡាក់ភក់ណាស់ បងឯងស៊ីយើងទាំងភកដូច្នេះមិនឆ្ងាញ់ពិសាទេ” ចចកឆ្លើយថា “ធ្វើដូចម្ដេចនឹងឆ្ងាញ់ពិសា ?” ។ កំពឹសថា “ត្រូវបងចចកឯងយកយើងទៅលាងទឹកឲ្យជ្រះស្អាត ហើយសឹមស៊ីនោះទើបឆ្ងាញ់ពិសា” ។ ចចកថា “ធ្វើដូចម្ដេចនឹងយកទៅលាងទឹកបានបើច្រើនដល់ម្ល៉េះ ?” ។ កំពឹសថា “បងចចកកុំព្រួយចិត្ត ខ្ញុំធានា គិតឲ្យបងឯងបានស្រួល ប៉ុន្តែត្រូវបងឯងតាមខ្ញុំ” ។ ចចកឆ្លើយថា “បងឯងធ្វើដូចម្ដេចក៏ខ្ញុំតាមទាំងអស់” ។ “បើ ដូច្នេះចូរបងឯងចុះមកដេកននៀលក្នុងភក់នេះ ហើយយើងទាំងអស់គ្នានឹងតោងរោមបងឯងៗនាំយើងទៅរកស្ទឹងបឹងបួឯណា មានទឹកថ្លាច្រើន បងឯងលាងយើងឲ្យស្អាត ហើយសឹមស៊ីឲ្យឆ្ងាញ់ពិសាតាមចិត្តចុះ” កំពឹសនិយាយ ។
ឯចចកជាសត្វល្មោភហើយល្ងង់ក៏ធ្វើតាមពាក្យកំពឹស ។ កំពឹសនិងត្រីបបួលគ្នាតោងរោមចចកទៅលុះដល់បឹងមួយធំវែង មានទឹកថ្លាល្អចចកដើរចុះទៅក្នុងទឹកអស់ត្រីនិងកំពឹសលោតទៅ ក្នុងទឹកបឹងប្រាប់ថា “បងចចកឯងទៅជញ្ជូនមកឲ្យអស់ សិន សឹមមកស៊ីឲ្យឆ្អែតតែម្ដង យើងនៅចាំបងនៅទីនេះ ។ ចចកក៏ទៅជញ្ជូនត្រី និងកំពឹសមកលុះត្រាតែអស់ពីត្រពាំងនោះ ។
ពួកត្រី កំពឹស ក្ដាម ខ្យង ដឹងថាចចកជញ្ជូនអស់ហើយនាំគ្នាមុជក្នុងទឹកជ្រៅបាត់អស់ ។ ឯចចកដឹងថាកំពឹសបញ្ឆោតដូច្នេះហើយ ខឹងណាស់ដើរទៅបបួលអស់សត្វធំតូច ដំរី រមាស ខ្លា គ្រប់សត្វ ទាំងពស់ថ្លាន់ ពស់ធំ ពស់តូច ទាំងសត្វហើរ គ្មានសេសសល់បន្ដិច បបួលគ្នាមកបាចទឹកបឹងនោះឲ្យរីងនឹងបានចាប់ត្រីក្នុងបឹងនោះស៊ី ឲ្យអស់ ចចកបានឲ្យពស់ថ្លាន់ធ្វើជាទំនប់ទឹក អស់សត្វឯទៀតក៏បបួលគ្នាបាច ។ សត្វក្នុងបឹងដឹងថា ចចកបបួលគ្នាបាចទឹកឲ្យរីងទឺងបឹង ភ័យណាស់ក៏គិតគ្នាថា “យើងធ្វើម្ដេចនឹងបានឲ្យអស់សត្វទាំងនោះលែងបាចទឹក ?” ។ កាលនោះត្រីក្រាញ់ឆ្លើយថា “ខ្ញុំ ឮគេថា បងសុភាទន្សាយជាអ្នកមានប្រាជ្ញាចេះដោះទុក្ខមនុស្សផងជាច្រើន ណាស់ បើដូច្នេះខ្ញុំនឹងទៅពឹងបងសុភាទន្សាយមកជួយដោះស្រាយទុក្ខអស់ យើង” ពួកត្រីគិតគ្នាហើយក៏ប្រើត្រីក្រាញ់ឲ្យទៅ អញ្ជើញសុភាទន្សាយ ។ ត្រីក្រាញ់ប្រឹងននៀលទៅលុះដល់ត្រូវថ្ងៃក្រៀមស្រកាអស់ ដល់យប់សុភាទន្សាយចេញមករកស៊ី បានឃើញត្រីក្រាញ់ននៀលដូច្នោះក៏សួរថា “បងត្រីក្រាញ់ទៅណា ?” ត្រីក្រាញ់ឃើញបងសុភាទន្សាយហើយមានចិត្តត្រេកអរណាស់ និយាយអង្វរថា “បង សុភាទន្សាយអាណិតខ្ញុំត្បិតត្រីទាំងអស់ក្នុងបឹង គេប្រើខ្ញុំឲ្យមកអញ្ជើញបងសុភាទៅ ត្បិតឮគេថា បងជាអ្នកមានប្រាជ្ញចេះកាត់សេចក្ដីដោះទុក្ខគេ បើអ្នកឯណាកើតទុក្ខបងតែងតែជួយដោះទុក្ខគេមិនដែលខាន ឥឡូវមានដំរី ក្របីគោ រមាស ជ្រូក ពស់ធំ ពស់តូច និងសត្វជាច្រើនទៀតបបួលគ្នាមកបាចទឹកឲ្យរីងនឹងបានចាប់ត្រីស៊ី អណ្ដើក កន្ធាយ
នៅមានត…
